തലയില്ലാത്ത തെങ്ങിന് തടമെടുത്ത് തൊഴിലുറപ്പ് തൊഴിലാളികൾ; സമൂഹമാധ്യമങ്ങളിൽ ചിരി പടർത്തി വീഡിയോ

കാസർകോട്: തൊഴിലുറപ്പ് പദ്ധതിയുടെ ഭാഗമായി ജോലി ചെയ്യുന്ന തൊഴിലാളികൾ പലപ്പോഴും വിമർശനങ്ങൾക്കും പരിഹാസങ്ങൾക്കും ഇരയാകാറുണ്ട്. അവരുടെ തൊഴിൽ സമയം, പ്രവൃത്തിയുടെ രീതി എന്നിവയെല്ലാം പലപ്പോഴും ഹാസ്യരൂപേണ ചർച്ച ചെയ്യപ്പെടാറുണ്ട്. സിനിമകളിലും കോമഡി ഷോകളിലുമെല്ലാം ഇത്തരത്തിലുള്ള വിമർശനങ്ങൾ സാധാരണവുമാണ്. അത്തരമൊരു രംഗം ഓർമ്മിപ്പിക്കുന്ന ഒരു സംഭവം കാസർകോട് ജില്ലയിൽ നടന്നതായി റിപ്പോർട്ട് ചെയ്യപ്പെട്ടിരിക്കുകയാണ്.

പരപ്പയിലെ ഒരു വീട്ടുമുറ്റത്തെ തലയില്ലാത്ത തെങ്ങിനാണ് തൊഴിലുറപ്പ് തൊഴിലാളികൾ തടമെടുത്തത്. തെങ്ങിന്റെ മുകൾഭാഗം പൂർണ്ണമായും നശിച്ചുപോയ നിലയിലായിരുന്നിട്ടും, അതിന്റെ ചുവട്ടിൽ മനോഹരമായി തടമെടുത്ത് വെള്ളം ശേഖരിക്കാനുള്ള സൗകര്യമൊരുക്കിയാണ് തൊഴിലാളികൾ മടങ്ങിയത്.