കോഴിക്കോട് ഷിഗെല്ല ബാധിച്ച് മാവൂർ സ്വദേശി മരിച്ചു; ഏഴ് പേർക്ക് കൂടി രോഗസ്ഥിരീകരണംj

കോഴിക്കോട്: സംസ്ഥാനത്ത് ഷിഗെല്ല ബാധിച്ച് ഒരാൾ കൂടി മരിച്ചു. കോഴിക്കോട് മാവൂർ സ്വദേശിയായ 54കാരിയാണ് മരിച്ചത്. ഇതിനു പുറമെ ഇന്ന് ഏഴ് പേർക്ക് കൂടി രോഗം സ്ഥിരീകരിച്ചിട്ടുണ്ട്.

കോഴിക്കോട്, തിരുവനന്തപുരം, തൃശൂർ, മലപ്പുറം, വയനാട് എന്നീ അഞ്ച് ജില്ലകളിലായാണ് പുതിയ കേസുകൾ റിപ്പോർട്ട് ചെയ്യപ്പെട്ടിട്ടുള്ളത്. രോഗവ്യാപനം തടയുന്നതിനുള്ള പ്രതിരോധ പ്രവർത്തനങ്ങൾ ആരോഗ്യവകുപ്പ് ഊർജിതമാക്കിയിട്ടുണ്ട്.

അതേസമയം, കോഴിക്കോട്ട് ആശങ്ക പടർത്തിയ നിപ വൈറസ് ബാധ നിയന്ത്രണവിധേയമാണെന്ന് ആരോഗ്യ വകുപ്പ് അറിയിച്ചു. സമ്പർക്കപ്പട്ടികയിലുള്ളവരിൽ നിന്നും ഇതുവരെ പരിശോധനയ്ക്ക് അയച്ച സാമ്പിളുകളുടെയെല്ലാം ഫലം നെഗറ്റീവായി എന്നത് വലിയ ആശ്വാസമാണ് നൽകുന്നത്. പുതിയ പോസിറ്റീവ് കേസുകൾ ഒന്നും തന്നെ റിപ്പോർട്ട് ചെയ്യപ്പെട്ടിട്ടില്ല.

എന്നാൽ, നിലവിൽ നിപ ബാധിച്ച് ചികിത്സയിലുള്ള രോഗിയുടെ നില ഗുരുതരമായി തുടരുകയാണ്. ഇദ്ദേഹം ഇപ്പോൾ വെന്റിലേറ്ററിലാണ് ഉള്ളത്.

(ജാഗ്രത പാലിക്കുക: ഷിഗെല്ല സ്ഥിരീകരിച്ച സാഹചര്യത്തിൽ വ്യക്തിശുചിത്വവും ഭക്ഷണകാര്യങ്ങളിലെ ശ്രദ്ധയും കർശനമാക്കണമെന്ന് ആരോഗ്യവകുപ്പ് മുന്നറിയിപ്പ് നൽകുന്നു. തിളപ്പിച്ചാറിയ വെള്ളം മാത്രം കുടിക്കാനും, ഭക്ഷണം എപ്പോഴും മൂടിവെക്കാനും ശ്രദ്ധിക്കേണ്ടതാണ്.