സംസാരിക്കില്ല, ഉറക്കമില്ല; അഹമ്മദാബാദ് ദുരന്തത്തിന്റെ ആഘാതത്തിൽ നിന്ന് മുക്തനാകാതെ വിശ്വാസ്

രാജ്യത്തെ മാത്രമല്ല, ലോകത്തെ തന്നെ നടുക്കിയ അഹമ്മദാബാദ് വിമാനാപകടത്തിൽ നിന്ന് ജീവനോടെ രക്ഷപ്പെട്ട ഏക യാത്രക്കാരനാണ് വിശ്വാസ് കുമാർ രമേഷ്. ജീവനക്കാരും യാത്രക്കാരും ഉൾപ്പെടെ 242 പേരുണ്ടായിരുന്ന വിമാനം പറന്നുയർന്ന് നിമിഷങ്ങൾക്കകം തകർന്നുവീണ് കത്തിച്ചാമ്പലായപ്പോൾ അടിയന്തര വാതിലിന് സമീപമുള്ള 11 എ സീറ്റിലായിരുന്ന വിശ്വാസ് കുമാർ മാത്രം അത്ഭുതകരമായി രക്ഷപ്പെടുകയായിരുന്നു. ഭാഗ്യവാനായ വ്യക്തിയെന്നാണ് വിശ്വാസിനെ പലരും വിശേഷിപ്പിച്ചത്. എന്നാൽ ദുരന്തമുണ്ടായി ഒരു മാസം പിന്നിട്ടിട്ടും അതുണ്ടാക്കിയ കടുത്ത മാനസികാഘാതത്തിൽ നിന്ന് വിശ്വാസ് ഇനിയും മുക്തനായിട്ടില്ല.

മാനസികാരോഗ്യ വിദഗ്‌ധരുടെ സഹായത്തോടെയാണ് വിശ്വാസ് കുമാർ ഓരോദിവസവും തള്ളിനീക്കുന്നതെന്ന് വാർത്താ ഏജൻസിയായ പിടിഐ റിപ്പോർട്ട് ചെയ്തു‌തു. ദുരന്തത്തിനുശേഷം വൈകാരികമായി തകർന്ന നിലയിലായിരുന്നു അദ്ദേഹം. ഉറക്കത്തിനിടെ അർധരാത്രി വിശ്വാസ് ഞെട്ടിയുണരുന്നത് പതിവാണെന്ന് അദ്ദേഹത്തിന്റെ്റെ കസിൻ സണ്ണി പറയുന്നു. ഞെട്ടിയുണർന്നാൽ പിന്നെ വീണ്ടും ഉറങ്ങുകയെന്നത് വിശ്വാസിന് ദുഷ്കരമാണ്.

'വിദേശത്തുള്ള ഞങ്ങളുടെ ബന്ധുക്കൾ ഉൾപ്പെടെ ഒട്ടേറെ പേർ വിശ്വാസിന്റെ കാര്യങ്ങൾ ചോദിച്ച് വിളിക്കാറുണ്ട്. എന്നാൽ അവൻ ആരോടും ഒന്നും സംസാരിക്കാറില്ല. വിമാനാപകടവും ഒപ്പമുണ്ടായിരുന്ന സഹോദരന്റെ മരണവും ഉണ്ടാക്കിയ മാനസികാഘാതത്തെ അവൻ ഇതുവരെ അതിജീവിച്ചിട്ടില്ല.' -സണ്ണി പറഞ്ഞു.

'ഇപ്പോഴും അവൻ അർധരാത്രി ഉറക്കത്തിനിടെ ഞെട്ടിയുണരും. പിന്നീട് ഉറങ്ങാൻ അവൻ പാടുപെടും. ഇതിന് പരിഹാരം തേടി രണ്ടുദിവസം മുമ്പ് ഞങ്ങൾ അവനെ സൈക്യാട്രിസ്റ്റിന്റെ അടുത്ത് കൊണ്ടുപോയിരുന്നു. നിലവിൽ ലണ്ടനിലേക്ക് മടങ്ങിപ്പോകാൻ തീരുമാനിച്ചിട്ടില്ല. ചികിത്സ തുടങ്ങിയതല്ലേയുള്ളൂ.' -സണ്ണി കൂട്ടിച്ചേർത്തു.