ചക്കിട്ടപ്പാറ : കോഴിക്കോട് പെരുവണ്ണാമൂഴിയിൽ വീണ്ടും മാവോയിസ്റ്റുകൾ എത്തി. ചക്കിട്ടപ്പാറ പഞ്ചായത്ത് പ്രസിഡന്റിനെതിരെ പോസ്റ്ററുകൾ പതിച്ചു. മുതുകാട്ടെ ഖനനം ചെറുക്കുക, സിപിഐഎം നുണകൾ തിരിച്ചറിയുക എന്നീ ആഹ്വാനങ്ങളും പോസ്റ്ററിലുണ്ട്. സംഭവത്തിൽ പൊലീസ് അന്വേഷണം തുടങ്ങി. പെരുവണ്ണാമൂഴി മുതുകാട് നാലാം ബ്ലോക്കിലെ ഉദയഗിരിയിലാണ് മാവോയിസ്റ്റ് പോസ്റ്ററുകൾ പ്രത്യക്ഷപ്പെട്ടത്.
ഇന്ന് പുലർച്ചെയാണ് പോസ്റ്ററുകൾ കണ്ടത്. ബസ് കാത്തിരിപ്പ് കേന്ദ്രത്തിലാണ് പോസ്റ്ററുകൾ ഒട്ടിച്ചത്. സമീപത്തായി ഒരു ബാനറും കെട്ടിയിട്ടുണ്ട്. പയ്യാനിക്കോട്ടയെ തുരന്നെടുക്കാൻ അനുവദിക്കരുത്, കൃഷിഭൂമി സംരക്ഷിക്കുക, ഖനനം ചെറുക്കുക തുടങ്ങിയ മുദ്രാവാക്യങ്ങളാണ് പോസ്റ്ററുകളിൽ ഉള്ളത്. സിപിഎമ്മിനെതിരെയും ചക്കിട്ടപ്പാറ പഞ്ചായത്ത് പ്രസിഡന്റിനെതിരെയും പോസ്റ്ററിൽ ആഹ്വാനങ്ങളുണ്ട്.
മാവോയിസ്റ്റ് ഭീഷണിയുള്ളതിനാൽ പഞ്ചായത്ത് പ്രസിഡന്റ് സുനിലിന് നേരത്തെ തണ്ടർ ബോൾട്ട് സുരക്ഷ ഏർപ്പെടുത്തിയിരുന്നു. മലയോര മേഖലയായ പെരുവണ്ണാമൂഴിയിൽ മുൻപും മാവോയിസ്റ്റ് സാന്നിധ്യം കണ്ടെത്തിയിരുന്നു. വീണ്ടും പോസ്റ്ററുകൾ പ്രത്യക്ഷപ്പെട്ട സാഹചര്യത്തിൽ പെരുവണ്ണാമൂഴി പൊലീസ് സ്ഥലത്ത് പരിശോധന നടത്തി.